A kishte dijeni për shpenzimet e bashkëshortes së tij? Veliaj përgjigjet nga qelia

Erion Veliaj, i cili prej disa ditësh ndodhet në qeli ka folur në lidhje me akuzat ndaj bashkëshortes së tij, dhe shifrave që sipas dosjes rezultojnë të jenë shpenzuar prej Ajola Xoxës. Në një intervistë me shkrim këtë të enjte për emisionin Top Story ne Top Channel ai i cilësoi shpifje.

Pyetje: A ke pasur apo jo dijeni për shpenzimet e bashkëshortes tënde Ajola Xoxa? A e ke ditur që janë shpenzime personale apo të bizneseve të saj? A ke pasur dijeni për shifrat e këtyre shpenzimeve?

Erion Veliaj: Bashkëshortja ime vjen nga një familje e nderuar, e pasur dhe me 17 vjet karrierë në studio e biznes privat. Ka shpenzuar prej të ardhurave të saj vetëm 50,000 lekë në muaj nga karta e saj personale, në total 7 milion lekë të reja në rreth një dekadë.

Të mbledhësh gjithë bilancet vjetore të 7-8 enteve që merren me teatro, skenografi, videoklipe, opereta, mjuzikalë, sfilata mode, photo shooting, dhe garderobat skenike në 17 vite t’i trajtosh si personale në një ditë, është ligësi e misogjeni. Janë të gjitha të deklaruara nga secili ent, me taksa, dogana e tvsh në rreth dy dekada.